MNF chuan, ZPM kaihhruai Sawrkarin FCAA 2023 pawmpuina Legislative Assembly-a pass kha a pawi kan ti tak zet a. Kan ram inhumhimna dan hlu tak India Constitution Article 371G engmah lova an chantir mai hi a lungchhiatthlak kan ti a, thisen leh nunna tam tak senga kan neih dan hlu tak hnawlna hi sut leh a nih theihna turin MNF chuan theih tawp a chhuah zel dawn a ni, an ti.

MNF chuan, khawthat lai zawnga an ngaihthah Mizoram hmun tin deuh thawa kawng chhia avanga ram mipuiin harsatna tam tak kan tawk reng hi a pawi kan ti a. Kawng siamna tura mipui hnena ZPM Sawrkar-in chhiah sang tak an la chung pawha kawng a chhe reng mai hi a pawi kan ti tak zet a. A rang thei ang berin Mizoram hmun hrang hranga kawng chhiate hi siamtha thuai turin MNF chuan sawrkar kan phut tlat a ni, an ti bawk.

Kan MLA duh tak, Pu Lalrintluanga Sailo-in hun lo taka min kalsan avanga a hmunruak hnawhkhat tura inthlanna buatsaih turah hnehna chang ngei turin theihtawp kan chhuah chhunzawm zel dawn a. Candidate atana kan Party vawrchhuah Dr. R. Lalthangliana, Sr. Vice President, inpekna leh theihtawp a chhuahna a ropui kan ti a, Dampa bial mipui zawng zawngte Dampa bial leh Mizoram tan khawngaih taka Dr R Lalthangliana lo vote vek turin kan ngen, tiin an tarlang.